Khuang Par a thattu darling Peter Van Bawi Lian: ‘A chungkhar nih ka fa an thah, an kan then rih’

US ram Indianapolis ah nungak Khuang Hliang Par a thattu Peter Van Bawi Lian nih a nupi a thahnak aruang le a lungfahnak kong vialte Facebook ah sau ngai in a tial.

“Ka darling he hlunghlai ngai in thitumnak tuah kan timh, phaisa zong kai khon, nain a chungkhar nih an duh lo ruang ah kan puai a piat, a thli tein kan zam, hmun dang ah khua kan sa.

“Ka darling a chungkhar nih ‘bawiphun kan si, nupi man caah $1,500 na kan pek a hau an ka ti, nain nupi cu duhdawtnak in ngahmi asi, phaisa in cawkmi a si lo ka ti caah phaisa cu ka pek duh hna lo.

“Ka darling cu a chungkhar sin ah a kir hnu in phone a rak ka chawn, nau a pawinak kong aka chimh, kei zong fa ngeih in amah he chungkhar ser ka duh bikmi a si, fapa dawh te ngeih ka duh ka ti tawn, nain a chungkhar nih amah duh lo buin ka fa cu an thah, a tah buin a nawl chih ko hna nain kan minchia lai an ti caah ka fa cu an thah hi a si.

“Ka fa an thah lawng si lo, keimah he i then ding ah an hnek chih, a tah buin then lo ding a nawl hna nain an duh lo.Hramhram in an kan then.

“Kei nih Chinmi zapi sin chim ka duhmi pathum a um:
1.Zeitik hmanh ah hramhram in nau thahter hlah u. Hringtu nu pakhat cung ah biachahnak ai hngatmi a si.
2.Hramhram in ai duh komi nuva then hna hlah u. Nuva cung ah ai hngatmi a si.
3.Keimah bantuk in thluak zawtnak ka ngei tiah na thei ko ahcun i thlop colh hram. Huatnak lungthin le thinhunnak nih na nunnak in hrawh hram hlah seh” tiah Peter nih a tial.

“Thluak zawtnak phun khat ka ngei, ka darling hi ka dawt tuk i aka kaltak sual lai timi phannak he ka khat, zawtnak a si, thlop awk a si timi ka theih ko nain hmailei ka riantuannak aka don khan sual lai ka phan caah kai thlop bal lo,” tiin a tial fawn.

Ka darling a temtuar tuk, a lung fak tuk, a biapi bik cu a chungkhar ruang ah a si, hiti a temtuarnak vialte tlau dih seh ka ti caah ka thah, kei zong amah um ti lonak vawlei ah nun ka zuam ti lo, vawlei ah caan tampi ka um ti lai lo, kum 22 ka phan ti lai lo(atu hi kum 21 a si rih), a kan thencheutu Nei Nei le Saw Lin kan huat hringhran hna tiah amah tein i thah ai timhnak kong zong a tial chih.

A cabia sau ngaingai, English in tling tein rel a duhmi nih hika link ah rel khawh a si.