Lai mino 15 ‘saram bantuk in’ Japan ah a hremtu puaisa Khua Lian Kam kong ka theih khawh tawk

Japan ah riantuan ah nan kal lai a ti hna i phaisa ting 80 a haltu Khua Lian Kam a kong ka theih khawh tawk ka hun tial than, thuk piin ka hlat hnu ah ka tialmi a si.

Nikum November thla ah khan Lai mino 15 a ratpi hna, Tokyo an phak tik ah minung 4 umnak ah ihnak tiang um loin a chiah tak hna, puan zong a pe hna lo, rawl zong a pe hna lo, Tokyo um Laimi nih an zuan hnawh hna hlan zaan khat cu puan lo bak in khua an dei.

Laimi nih an zaangfak tuk hna caah an si khawh tawk cio in rawl an cawk piak hna, ihphah le puan zong an pek hna, angki leng zong an pek hna. An umnak belte cu a fa tuk caah ihnak zong a tha lo, an thu peng ti a si.

Nai April thla ah tam nawn a ratpi rih hna,Laimi um lonak khuate ah a chiah tak hna i rawl ei awk ngei loin an um, Kawlmi nih an zoh khenh hna, Kawlpa a lungrawk tuk caah Facebook in fak taktak in a rak zai hnawh beh kha a si.

Atu May 1 ah khan phu khat a ratpi rih hna(keimah Lungthli Tum nih phaisa ka tuahpiakmi ka cousin Apawhu zong ai tel ve), ka naupa kong ah Khua Lian Kam ka chawnh lio ah cun ‘work visa in an kal lai, rian an tuan colh lai, ting 80 nan pek colh belte a hau’ aka ti. Nain, ka naupa a ratnak cu visit(khual tlawn visa) a si. A ratpimi dih lak hi visit visa lawngte an si.

Voi 1nak a ratpimi phu 15 lak ah 11 hi Yangon ah an kir than, 4 lawng an tang. Refugee a sawk ter hna.

Atu a voi 2nak ah a rami pawl kir an duh, phaisa khirh a timh hna lo ruang ah an taap rih ko. Kawlpa nih a si khawh chung in a tawlrel piak ve hna. A voi 2nak a rami lak ah pakhat hi Airport ah palik nih an tlaih i Yangon ah an kuat than.

Khua Lian Kam hi mirum chung an si, Vomkua khuami an si hna. Apa zong hi Malay puaisa a rak tuan ruang ah palik nih kum tam nawn thong an thlak balmi a si. A nupi hi Kachin nu a si.

Note: Hi thil sual a tuahtu ka phuan ruang ah aka tlerhtu nan um len, kei hi tlerh poah ah tih a hmangmi ka si lo. Mah sualnak/crime hi cozah sin a phan sual ahcun ‘human trafficking case’ in nunchung thongtla khawh dirhmun ah a ummi a si.

Khua Lian Kam a sual ning le Lai mino a hlen ning hna cu Japan um Laimi dih lak nih theih a si, nan theihmi rak hal hna law an in chimh cio dih ko hna lai.

bawi1

bawi2

bawi3