Puaisa Khua Lian Kam inn ah a um rihmi pakhat: Phaisa cawi a karh he ting 120 a phan cang, i thim awk ka ngei lo

Lai mino a hlengtu puaisa Khua Lian Kam he kan i chawn i ka halmi aka let khawh ti lo hnu ah a phone a thah, ka call than len nain amah nih a tlaih ngam ti lo i a sin a ummi pakhat nih a rak tlaih.

Minute 1:11:00 zawn ah khan zoh khawh a si lai

A min langhter a duh lo, a khua zong langhter a duh lo, a mui zong a langhter ngam lo, sau nawn live in bia kan i ruah, Khua Lian Kam sin ah a um rih ko nain a sining tam nawn a chim.

Ting 80 ka pek, hihi midang phaisa cawi in ka pekmi a si, atu ah cun ting 120 tiang a phan cang, ka pekmi ting 80 ning tein ka khirh hmanh sehlaw leiba he kai ciah cang caah i thim awk ngei loin voi 2 tiang Japan ah ka ratnak hi a si tiah live biaruahnak ah cun aka chimh.

Anih hi November thla ah a ratpimi 15 lak ah ai tel vemi pakhat a si, visit visa a si caah refugee sawk loin a kir ve, Rangon ah work visa in nan ra than lai a ti hna, nain visa a phak taktak tik ah work visa a si ti lo, visit visa a si.

Hi bia ka ruahmi pa nih cun Khua Lian Kam hi a mawhchiat tuk lo, kanmah zong kan palh ve ko a ti. Voi 2 tiang a hlen ve cang nain a dirhkamh pah rih, midang he ai lo deuh lo. A dirhkamhnak a ruang hi Vomkua khuami a si ve caah a si tiah theihhngalh pakhat nih a ka ti(Vomkua khuami a si ve taktak maw timi ka thei lo).

Atu hlen a tongmi tampi lak ah cheukhat cu lei, inn le ngeihchiah chawva tam lak te zuar in ting 80 a pemi an si hna. Cheukhat cu mi phaisa an cawi, a karh he a si tik ah lungkuai in an um hna tiah ka theih.

May 1 ah a phan tharmi pawl hi cu a hlen hna timi an thei tuk rih lo, keimah phaisa in a kalmi ka naupa/cousin (Biak Za Hup) zong ai tel ve. Ka naupa nih cun ‘phan ding a si lem lo, refugee kan sawk ko lai ee’ a ti.Amah caah Khua Kam Lian a pa Pu Tial Bik phone ka chawnh ah cun ‘work visa in a kal lai, rian a tuan colh lai’ a rak ka timi a si.

November thla ah minung 15 a ratpi hna, visit visa a si caah 11 an kir i 4 hi refugee an sawk. April ah phu khat a ratpi rih hna, Kawlpa Mg Nanda( Facebook live in a zai lenmi pa) pawng ah a chiah tak hna, inn man pek awk ngei lo le ei awk cawknak ngeih loin an um hnu ah atu ting 10 cio an hal than i a pe duh rih hna lo. An visa cu thlakhat ca asi caah a dih cang, work visa sawk caan a um ti lo, refugee an sawk dih(riantuan a ngah lo).

Atu May 1 ah a rak luhpimi hna cu visit visa in a si rih hoi caah work visa ah ka thlen lai a timi hi a si kho lomi a si, aruang cu November le April ah a rami a thlen piak khawhmi an um rih lo.

Hi ruang ah keimah ka naupa cu a phak le cangka in work visa thlen ding i ruahchan ti loin refugee sawk colh a timh venak hi a si. May 1 ah a phanmi pawl hi cu amah sin a um ter hna caah harnak an tong hraw rih lo.