Victor Biak Lian: ‘Mah tein i thahnak kong ah pakhat khat tuah a hau cang’

Nithum chung ah Hakha in minung pahnih(Van Ram Bawi le Pi Run Ci) hri in an i awk i an thih hnu in Victor Biak Lian nih ruah awk tiah a tialmi capar a si.

Ruahawk:

Nai hrawng cu kan miphun chung ah mah le nunnak i lak a tam ngai. Thawngpang lawng cu kan theih leng mang i a ruang set kan thei bal lo. A ruang um lo cun an nunnak cu an i la hrim lai lo. Khuaruah sual cu a si ko na in, vun hlathlai deuh a hau mi a um ko rua! Cu hna cu, thluaklei damlonak maw a si? Nungak tlangval, chungkhar buai nak, leiba sang ngeih, lakfa pawi i thitduhlo etc..

Cu hna pin ah ruah chih a hau mi cu, rit si hmang hna an rak si ziar maw? A si lo le zu ding (alcoholic) hna tah an si sual maw? Hi thil pawl nih hin lungsau ruat kho lo in a tuah tawn.

Thihnak tuarmi chungkhar tantak mi hna ca ah a fak ngai ngai ko na in, hi kong ah Krihfa bu lei in siseh, community lei in khuaruah a hau. “Wake up call” a si. Tho cang! I thang cang tuah! ti in a kan auh mi a si. Pakhat khat tuah a hau.

Cun, ka nolh rih duh mi cu: mithi ruak hmanthlak siseh, online in ruak hna kan i humh i zapi nan kan hmuhsak mi hi cu vun ruah deuh a hau.

Cu pin ah, dam lo sizung um mi kan derthawm lio hmanthlak hna maw? Thideng cang mi hmanthlak post kan hman peng rih mi zong hi a tha lo. An mah mizaw nih a duh le duhlo zong khi kan ruat lem lai lo dah! Hi zong hi a tha lo.

Kan i dawh lio le kan dam lio hmanthlak tu kha a tha deuh lo maw?

Upatnak he,

Victor Biak Lian
Ottawa