AA le Tatmadaw an i phomh ruang ah Chinmi ramlak an zam, zaangfak an si ko

Paletwa peng um Chin mi le Rakhine mi 250 hrawng cu AA le Tatmadaw an i kah ruang ah an inn le lo an zam tak i Bangladesh ah an lut, ram lakah khua an sa.

An zamnak hi khua a um ko nain khuami nih an cohlang kho hna lo, an ti khawh tawk rawl an pek ko hna nain ramlak ah an umter hna. Angki lum le puan zong an ngei lo, khuasik lakah temtuar ngai in an um hna ti a si.

An umnak hi motor zong a phan lonak hmun a si, ke in nikhat hrawng kal a hau. Ke kal a hau caah bawmhnak petu zong fawi tein an kal kho lo.

A zammi lakah ngakchia 60 hrawng an i tel ve, khuasik lakah rawl lo le puan loin an um tikah ngakchia caah zawt a fawi tuk, ngakchia cheukhat cu an zaw i an lungfim ti lo ti a si.

Atu hi bawmhnak petu NGO hna nih siibawi le din ei awk an kuat hna. Nain, ke in kal a si caah tampi an kalpi kho lo.

AA le Tatmadaw an i phomhnak hmun ummi inn hna cu mei an khangh chih lengmang ti a si, a khanghtu hi Tatmadaw an si tiah ralzam hna nih an chim. Irrawaddy