CBC USA cathanh: ‘Rev. Dr. Thlaawr Bawihrin biachim kong ah kan ngaihchia ngai’

Zotung miphun le Dr. Thlaawr Bawihrin kar buainak kong ah CBCUSA upa hna nih cathanh an chuah, Dr. Thlaawr a biachim nih ngaihchiat lungfahnak a chuahpi caah kan ngaihchia ngai tiah an chim.

CBCUSA cu Khrih khamhnak thawngtha karhternak caah, a hleikhun in Chin miphun pumsa, thinlung le thlarau thanchonak caah rian a tuanmi bu a si, Dr. Thlaawr a biachim hi CBCUSA dirhmun le lungput a si hrimhrim lo tiah cathanh an langhter chih.

CBCUSA General Secretary Rev. Dr. Thlaawr Bawihrin nih nai CBCUSA BT meeting ah Laiholh kilven a herhnak kong a chim i Zotung nih Kawlholh an hman tukmi a uar lonak kong zong a chim chih. A chimmi lakah ‘Zotung nih Kawlholh hi vancung kainak bantuk ah an ruah’ timi ai tel chih caah Zotung miphun an lungfak i fak piin Dr. Thlaawr cu an soisel ve.

Hi buainak kong ah Dr. Thlaawr nih,”Tulio FB ah kan hnu BT lio ah bia ka chimmi he pehtlai in Zotung kan unau zeimawzat nih lunglawmh lonak langhternak an tialmi ka hmuh tikah ka lung a tha lo.

“BT lio ah ka chimmi Chin miphun dihlak zeitindah lungrualnak lam ah kan kal khawh lai (Chinism) timi hmuitinh in ka chim duhmi asi. Chin miphun nih Chin sining tein kan Chinram le Chin miphun zohkhenh le kilkamh ding hi ka saduhthah asi. Cucaah ka miphun hawi asimi Zotung ka unau hna nih a ruah zia nan thiamnak lai Bawi Khrih min in kan nawl hna,” tiah ngaihthiam halnak a tial.