Chief Minister Lian Luai: 2018 ah Chinram 66% cu Mahadat-a line mei an ngah lai

Chinram khuapi deuh pawl 24hr chung electric mei a petu Mahadat-a line hi atu a ngah rih lonak Chinram khua tampi ah phakter kan timh cuahmah i 2018 ah cun Chinram 66% hi Mahadat-a line kan hmang kho cang lai tiah Chinram Chief Minister Pu Lian Luai nih a chim.

Khuapi kan phakternak lam pawngkam ah a ummi khuate pawl zong transformer kan bunh piak hna lai i Mahadat-a line hi pek cio an si te lai, 2018 tik ah cun Chinram 66%(cheuthum cheuhnih) cu mei kan pek khawh cang ko lai ka zumh tiah Kamaryut he biaruahnak ah a chim.

NLD cozah kan kai hnu in ngandamnak lei, fimcawnnak lei le lampi remhnak ah biatak tein kan thangcho deuh tiah a chim.

Chinram chung ah hotel le khual tlunkal duhnak ser kan timh len ko nain khuami sin in biaknak dang le miphun dang cohlang lo, kanmah kan pipu vawlei a si, kanmah vawlei a si tibantuk duh lonak tete a um caah a har ngai tawn tiah a chim fawn.

Fawi tein kan tuah khawh ko lai kan timi cheukhat hi kan ruah lo leng in an rak har, inn saknak tibantuk zoh ahcun Kawlrawn ah thetse Ks.10,000 man kha hika ah cun tingkhat leng a si cang tiah a chim chih.