Hakha CND paih zuamnak champion cu phaisa ting 15 pek a si cang lai

Hakha ah tuah dingmi Chin Miphun Ni paih zuamnak ah champion cu ting 15 pek a si cang lai tiah paih committee hruaitu Pu Chum Ling nih Chinland News ah a tanglei bantuk in a chim.

Kumdang bantuk in tukum a kum(71) nak kan miphun ni ah lai paih kan tuah than ko lai. Cozah lei nih lai paih tuahnak ding caah Sing 30 kan i bawmh hna lai an kan ti. Nikum zongkha sing 30 an rak kan bawmh nain a dih mi kha Sing 43 kan rak dih Sing 13 hi a leng lei in an rak kan bawmh mi tete kha kan khon i laksawng ah kan bet dih. Tukum hi Sing 40 tal in rak kan bawmh kho uh law kan ti hna nain budget a um lo an ti i Sing 30 lawng bawmh dawh kan si.

Tukum CND ahhin ramdang lei in a rak kan zawh ding mi hna hi fiang tein kan chim khawh rih hna lo.Pu Ang Cung he phone 2 kan i chawn i Rung Lian Ceu le a dangdang pathawng 4 hrawng hi Hakha lei in rak tlung in Ngaland lei zong kal pah phum in cun kan i chawn ko nain tlamtling lai maw ti mi naihrawng kan i chawn kho rih lo tiah laipaih lei kong kau ah tuanvo ngeitu lutlaih Pu Chum Ling nih Chinland News sin ah a chim.

Tukum CND lai paih ah laksawng phun (7) in kan then.
1.Zuamcawh Bualco
2. Zuamcawh pahnihnak
3.Zatlang Bualco
4.Tam bik teitu
5.Paih dawh bik laksawng
6.Club paih bualco
7.Club paih pahnihnak tiin phun (7) in then an si.

Zuamcawh bualco hi laksawng Sing 500,000 a si i(North America Paih Committee) nih Sing (10) le taisawm an kan bet piak caah Zuamcawh bualco cu laksawng cu Sing 15 le taisawm a si lai.
Zatlang Paih bualco cu Sing 5 a si i a kan bet piak mi an um phum ahcun a kai te lai tinak a si a tutiang ahcun zeihmanh a um rih lo.

CND ah a paih mi mi poah minung pakhat teiah ngakchia hi 2000,3000 le upa a paih mi pakhat teiah 5000 tiin kan pek tawn hna.

Tukum CND cu kumdang bantuk in vawlei cungah a um mi chin miphun dihlak nih an umnak hmun cio in zohkhawh dih ding in kan i timh ko.Amah belte a paih mi caah laksawng chap ding tete caah a kan hlut kho mi hna tu kha thlah ter siseh law ti cu kan duh. Nain thaizing kiptu ah meeting kan thu than te hna lai i a fiang te lai tiah Pu Chum nih a biapeh ah a chim.

Tutan CND paih cu kumdang bantukin Febuary 19 zing suimilam 10 AM in kan thawk lai i zan suimilam 12 tiang cun a thaizing 20 khi zan suimilam 10 hlan ah dih khawh ding in kan i zuam lai, Kanmah duh ning in sisehlaw cu febuary 18 hrawng in thawk kho u sihlaw ti cu kan duh ko nain cozah lei nih kan Miphun ni hi zungkhar piak a um lo caah a poi tuk tiah a chim chih.