Hakha pastor hna zulhphung thar kong ah Pu Cung Hu: ‘Ka lunghno, ka ngaihchia tuk’

Hakha pastor hna nih an sermi bu HCMF(Hakha Christian Minister Fellowship) nih thihlohnak he pehtlaih in zulhphung thar an ser, hi zulhphung kong ah HOPE Blood Donor hruaitu Pu Cung Hu nih a lungfahnak a phuan.

HCMF zulhphung 11nak ah mah tein ai thatmi cu ruak thlah lio thlan hmun ah Khrihfa phung in vui lo ding, thlacamnak lawnglawng tuah piak ding timi ai tel. Hika zawnte ah Pu Cung Hu a lungtlin lo biknak a si.

Pu Cung Hu nih,”Ramleng Um Khrihfabu Hruaitu Hna Le Pastors Hna: Mah te in Nunnak aa La mi Hna Cu zeitindah nan vui cio hna?A tanglei ah ka rak thil mi hi Hakha Christian Minister Fellowship nih zulh awk ah an kan chiah piakmi a si…Thih Chin chap i taantak mi chung khar caah Khrihfa phung in vui lo ding ti cu. ka lung hno. Ka ngaihchia tuk,” tiah Facebook ah a tial.
phio
Photo credit: TCP

Mah tein ai thatmi hna Khrihfa phung in vui lo ding an timi hi Hakha ah mah tein ai thatmi milu zor deuh hna seh ti an duh caah a si kho men tiah a ruatmi zong an um, nain mah zulhphung an ser ruang ah mah tein ai thatmi milu an zor deuhnak ding lam a um lo tiah cheukhat nih an chim ve.