Hakha police nih Mai Ni Iang a pahtu Sai Wahna tlaih ding an auh cang

Hakha Gangaw lampi ah zuurit buin mawtaw a mawng i Mai Ni Iang a pahtu Sai Wahna Aung cu Hakha police nih tlaih ding ah an auh cang, Hakha lei a rat lio a si tiah kan theih.

A pah zaan ah Hakha police nih Sai Wahna Aung hi kan tlaih cang ko, nain poahmah 338 in kan tlaihmi a si i aamakhan in kan thlah than. Atu cu a pahmi a nunnak a liam caah poahmah zong 304 ah kan thlen, tlaih ding kan auh than cang tiah Hakha police nih an chim.

Sai Wahna cu Hakha ah a rak tlun lio a si, tuni hrawng cu Hakha a phan ko lai, amah tein rak tlung hlah sehlaw kanmah nih a umnak ah kan va tlaih colh ko hnga tiah an chim chih.
saiwo2
Sai Wahna hi Sagaing ramthen biaceihtu lutlai bik a fapa a si, Chinram biaceihtu lutlai bik nih kum thar hmanti ding ah an pafa in a sawm hna i kumthar hngah zaan ah zuurit buin mawtaw a mawng sual caah vanchiatnak an ton hi a si.

Mai Ni Iang hi a pah zaan ah Mandalay siizung an kalpi, nain an damh kho ti lo caah January 3 zaan ah a nunnak a liam. Tuni January 5 ah a ruak an vui. (Salai Khua Er, Hakha)