Mie pathawng Amos: ‘Rual Thang tei ta hrim ka duh, zapi theih in ka singkhaw’

Mie peng in paih thiam le pathawng bik tiah an ruahmi Amos nih US in a rak tlungmi Rual Thang Lian a singkhaw, tei ta hrim ka duh a ti.

Amos nih,”Nai Hakha tuahmi Chin Miphun Ni paih ah Rual Thang he kan i pai i vanchiat ah ka cawi ka tinak ah ka ke a rawk sual, ka ngamh tuk nain ka ke a tha ti lo caah ka tei manh lo. April 27 ah CPC nih tuahmi paih ah paih than ka duh ko. Amah tei ta hrim ka duh,” tiah Amos nih a chim.

Paih thawng Amos hi voi 7 bual a kir cangmi a si. Hakha Khuathar pathawng bik an timi Mang Hnin Thang, Hniang Hmung le Tawk Hre zong a tei bal hna. Rual Thang Lian he cun kan hnu Chin Miphun Ni ah an i pai i an i tei hlan ah Amos a ke ai ilh caah a pai kho ti lo.

Amos nih Rual Thang he i paih a duhnak kong cu Facebook ah a tial hmasa, cu hnu ah CPC riantuantu nih Amos kan ton i lungtak tein Rual Thang paih a duhnak kong cu a chim hi a si.

Kum 34 ka si cang i hmaikum lei cu ka pai kho ti lem lai lo, Rual Thang zong US ummi a si caah kan i ton khawhnak ding lam a tlawm ngai, tutan CPC paih hi amah he i ton ding caan tha bik a si, heavyweight singkhaw ah mee zuh hau loin amah he kan paihter ko u tiah Amos nih a chim.

Rual Thang hi Hniarlawn pathawng bik Tuan Ceu le Senthang pathawng bik Chinland Champion Van Bawi Hmun zong a tei balmi a si. Tial Cung Thang a tengh khomi cu amah Rual Thang le Runglianceu lawng an si rih. Tulio Hakha um Khuathar fa lakah pathawng bik tiah an ruahmi a si.

Rual Thang Lian cu April 29 ah a umnak USA lei kir ai tim. Amos he i paih ding a cohlan ahcun mee zuh loin heavyweight singkhaw paih ah anmah pahnih an i tong hmasa te lai.