Pu Bawi Khing bia cung ah Salai Ceu Bik Thawng: Ka lau i kai zum kho lo

Pu Bawi Khing nih tutan thimnak ah mee a ka pemi khua pawl cu uu-sa ka pek deuh ko hna lai tiah a chimmi kong ah CNDP General Secretary Salai Ceu Bik Thawng nih a tanglei bang in a ruahnak a chim.

“A Hnemh Zia Hmanh Kan Thiam Hna Lo; Thantlang mipi hna —- Tutan Thimnak ah ”NLD vote kan pek hna lo ahcun ‘nan caar lai’ an kan ti ee” tiah mipi nih nan thinphannak nan rak kan chimh. Culioah ”Cubantuk cu tlerh sawhsawh bia si. Khrifa phung zong si lo. Ramkhel thianghlimmi zong si lo. Ram mipi dihlak nuai 51 sinin a chuakmi phaisa si, NLD/cozah nih a hlei in chuahmi si lo” ka rak in ti hna.

“Asinain atu teinak a hmumi nih an bia bang thimfung a petu papek deuh dingin a taktak ah a hun ti tikah ka lau i kai zumh lei lo. NLD me thlak ruangah Thantlang mipi 41% cu hawihlei in papek i adang 59% thleidan an si ding cu. . .

“Kannih polisi cu ‘bawmdonh’ a si ballo khah. Hmuhtheih duh ruangah vote thlami kan si ballo. Kan techinfapar chan tiang kan miphun, kan faiceukulh vawlei, kan biaknak le kan caholh nuphung kilhimtu mahte khuakhannak federal phung fek ngah nakding caah pumpek nun ngei in vote thlami nan si ko caah le ‘hmuhtheih’ duh ruangah vote pe nan si lo caah hmuhtheihnak in papek nan si lo zongah nan thinphang hrimhrim hlah seh. Tlirh paoh ah a thirmi kan si ballo khah. Reem poh ah a temmi kan si fawn lai lo. Kan pupa hna zong kum 3000 tluk anmah ke tein an rak dir ko. Aho nih dah a kan cawm bal.

“Kan pupa hna Mirang Ral nih an rak reem le an rak leem hna hmanh ah an thinphang in an rak tluk lo bang kan miphun mahte khuakhannak kan ngah hlan le kan dothlennak a dih hlan tiang miphun polisi ah fek chinchin in dir ko rih hna usih, kan bantha reng chin ko hna usih! tiah kan kan sawm hna.”