UNHCR: Paletwa peng i kahnak a zual chin lengmang caah Chin refugee kong biachahnak kan let

Refugee a tlangtlaktu UNHCR nih Chinram a him tuk cang caah Malay le Delhi a um Chinmi vialte kirter dih ding biachahnak an tuahmi cu an let than, thlanglei Chinram ah i kahnak a zual chin lengmang ruang ah a si an ti.

UNHCR nih nikum kha Chinram chung kherhhlainak an tuah tikah phan awk a um lo, a kirmi caah a him tuk, Chin ralzam vialte kirter dih ding an si, UNHCR nih kan zohkhenh ti hna lai lo tiah biachahnak an rak tuah.

Nain, Chinmi upa le bu tampi nih UNHCR sin ah an biachahnak let ding ah nawlnak an tuah, Chin ralzam kir ter awk a that lonak le Chin ralzam nih UNHCR zohkhenhnak an herh rihnak kong an chim rel.

UNHCR biachahnak an tuah hnu in Rakhine ralkap an rak thawng chin ve, Chinram Paletwa peng ah biatak tein Tatmadaw ralkap he an i phomh, Paletwa peng Chinmi tampi harnak an tong.

Paletwa peng i kahnak ruang ah Chinmi harnak an tonmi kong cu media kip nih an phuan i UNHCR zong nih a theih ve, hiti i kahnak hmun ah ralzam kirter awk a si lo tiah an ruah caah Malay le Delhi um Chin ralzam zohkhenh rih ding biachahnak an tuah than hi a si.