Zotung kong ah Dr. Thlaawr: ‘Ka palh, Jesuh min in ngaihthiam kan hal hna’

Chin miphun dawtnak kong ka chim lio ah Zotung kong tahchunhnak ka lakmi kha ka chim palh sualmi a si, ka chim hramhram mi a si lo, Zesuh min in ka ngaithiam hram u tiah Rev. Dr. Thlaawr nih Zotung miphun hmai ah ngaihthiam halnak a tuah.

Laimi cu Khrihfa kan si bantuk in Zotung kong hi ka chim hramhrammi a si lo, ka chim palhmi a si caah Bawi Khrih min in ka ngaithiam hram u, Zotung unau thlanglamh, nehsawh le zawmtaihnak lungthin pakhat hmanh ka ngei bak lo tiah Dr. Thlaawr Bawihrin nih a chim.

Zotung unau kong ka chim hi CBCUSA meeting lio ah a si lo, CNF Vice President Dr. Lian Hmung Sakhong le Chin party hruaitu David Ngaisak biaruahnak ah ka chim palhmi a si caah CBCUSA he pehtlaihnak a ngeimi a si lo tiah a chim chih.

Dr. Thlaawr Bawihrin hi US ram chung Baptist khrihfabu vialte i funtomnak bu CBCUSA i hruaitu lutlai bik secretary general le Zophei Baptist Church(Indiana) ah pastor a tuanmi a si.