A piangthar ngaimi Justin Bieber hi UFC thuatnak ah i mer ai tim cang ko rua

Pathian dawtnak a thei i a piangthar ngaimi hlasakthiam Justin Bieber cu MMA lei ah i mer ai tim cang rua, ruah lo piin actor minthang Tom Cruise a singkhaw diam ko.

“UFC octagon ah i phomh ding Tom Cruise ka singkhaw. Tom Cruise nih a ngamh lo ahcun ralchia pa tiah auh awk a si hnga. Ahonih dah kan i velh khawhnak ding caah a kan tlangtlak hnga? UFC hruaitu Dana White nih tlang na kan tlak kho lai maw?” tiah Bieber nih Twitter ah a tial.

Zeiruang thengte ah dah Justin nih Tom hi a singkhaw timi theih a si lo. An karlak ah i rem lonak pakhatkhat cu a um kho tiah ruah cio a si.

Tom Cruise hi action movie ‘Mission Impossible’ timi hna ai thlak balmi a si i velh a thiam pah ko lai tiah an ruah. Kum 56 a si cang, Bieber cu kum 25 lawng a si rih.

Justin nih a singkhaw le cangka in Conor McGregor a hun i thlak colh ve, Tom Cruise nih a ngamh ahcun kei nih tlang ka tlak hna lai a ti.

Tutiang ah cun Tom Cruise nih zeihmanh a leh rih lo. Ngakchia bia ah maw a ruah piak lai or a cohlan ko lai dah timi tampi nih an ceih ngaimi a si. BBC