A lor ngaimi phungki Wirathu tlaih ding nawl an chuah ko cang

Buddhist ralhrang tiah ramdang media lak zong ah an theih ngaimi phungki Wirathu cu taza an cuai i biaceihzung nih tlaih ding nawl an chuah ko cang.

Yangon GA zung nawlngeitu U San Myin nih U Wirathu hi rampi minchiatter sualpuhnak in taza a cuai hi a si, taza a cuainak upadi pohmah hi a ngan ngai caah nunchung thongtla kho ding dirhmun ah a um.

Biaceihzung nih tlaih ding nawl an chuah cang ko nain nawl an chuahmi ca cu police sin a phan rih lo, ca a phanh le cangka in an tlai te lai. Tlawmpal ah cun an tlaih cang ko lai tinak a si.

Wirathu hi Buddhist biaknak le Kawl miphun a tanh taktakmi a si, Kawl phun tanhtu phu zong a hruai hna. Muslim cu a huat hringhran hna, a huat hna nak kong pheh lo tein a phuan tawn.

Nai kha Yangon lam zawhnak ah bia a chim i holh chiahru ngai in Suu Kyi a soisel, a volhpamh chih. Fak ngai in NLD cozah a soisel hna, ralkap belte cu biatak tein a tanh fawn hna.