Huat tlai bik 2008 Constitution remh ding ah NLD nih kar an hlan thawk cang

2015 thimnak ah biapi bik in an aupimi 2008 Constitution remh ding timi lamthluan ah NLD MP hna nih kar hlan hram an thawk cang, tuni kha zohfeltu committee ser ding biatung an dirh.

Mah committee hi Hluttaw nih an fehter ahcun anmah nih 2008 Constitution in remh a herh tiah an ruahmi vialte an thim lai, remh a herh tiah an chuahpimi vialte cu Hluttaw ah an chuahpi lai i Hluttaw nih fehternak an tuah te lai.

Hi committee ser le fehter awk a si maw timi cu Hluttaw ah MP hna nih an i ceih hmasa rih lai, an ceih dih hnu ah committee chungtel an thim hna lai i remh a herhmi 2008 Constitution an zohfel lai tinak a si.

NLD nih 2008 Constitution remhnak committee ser ding biatung an dirhmi cu ralkap an lungrawk ngai, ning lo le cang loin rian an tuan, a phung a si hrimhrim lo an ti. Vote zong an pe duh lo, an dihlak in an dir.

2008 Constitution hi ralkap hnatlaknak loin remh khawh a si lo, ralkap nih veto power an ngei rih. Tutan NLD nih kar an hlanmi hi an hlawh a tling te hnga maw timi ruah awk ngai cu a si.