Kachin mipi hnatlaknak: ‘Myanmar kan chuah tak lai i Kachin cu ramdang kan ser lai’

Thailand ram Chiangmai ah Kachin ram zeitin sersiam awk a si timi kong ah Kachin mipi ni 3 chung biaruahnak an ngei i Myanmar ramkomh chuahtak ding hnatlaknak an ser khawh.

Myanmar ramkomh in kan chuak lai i Kachin ram cu mah tein ai ukmi ramdang ah kan ser lai, a thar in kan sermi Kachin ram ah cun mipi kut cung ah nawlngeihnak a um dih lai tiah an fehter.

Hi hnatlaknak a nun khawhnak ding caah Myanmar cozah nawlngeitu he ton biaruahnak ngeih ding, Kachin ram sersiamnak kong zong ah Kachin miphun hme vialte ruahnak hal cio ding zong biachahnak an ngei fawn.

Mah hnatlaknak kan sermi hi Myanmar cozah nih buaibainak phun khat ah a ruah awk a si lo, mipi nih an duhnak an chimmi hi biatak tein ruah piak awk a si tiah conference ah an thanh chih.

Kachin hriamtlai phu KIA hi hriamnam an i tlaih thawk lio ah Myanmar ramkomh chuahtak ding ral an rak tuk, nain a hnu ah cun federal ngah ding ah ral an tuk than. A hlan lio KIA dirhmun le Chiangmai conference kai Kachin hruaitu hna ruahnak ai khat ngai tinak a si.

Conference a kaimi an ruahnak hi Kachin mipi nih zeitluk in dah an dirpi timi theih a si lo, conference nih Kachin mipi zeitluk tiang an aiawh hna timi zong theih asi lo. RFA