Kachin NLD cozah vuanci 3 bak voikhat ah rian phuah an tong

Kachin ram Chief Minister Khet Aung nih a kut tang ummi vuanci pathum a auh hna i rian i phuahnak ca a tialter hna, atu cu President Win Myint nih a fehter cang.

Rian phuah a tongmi hna cu Agriculture, Livestock and Irrigation minister U Mya Thein, Natural Resources Minister U H La Aung le Minister for Social Affairs Dr. Thin Lwin an si.

Zeiruang ah dah rian a phuah hna timi cu an langhter lo, Suu Kyi nawlpeknak in rian phuahnak ca ka tialter hna a si timi lawnglawng chief minister nih a chim.

Thawl a tongmi lakah pakhat U Mya Thein cu a lungrawk ngai, eihmuarnak zong ka tuah lo, ka riantuannak kong zong ah report ka tong bal hraw lo, zeiruang ah dah rian an ka phuah hnga tiah a zai len ko.

Kan hnu zarh ah khan Kachin ram Suu Kyi a rak tlawng, hi lio zong ah rian phuah a tongmi vuanci 3 he an i tong ko hna, zei bia hmanh a chim lo ti a si.

Rian phuah a tongmi pathum nih zeiruang ah dah rian phuah an ton timi fiang deuh in theih an duh ngai, aruang theih khawhnak ding caah U H La Aung cu Suu Kyi ton a timh cuahmah ve. Irrawaddy