Lainawng Myanmar ralkap 7 cu kum 10 thongthlak an si nain kum 1 hlan ah an luatter hna

A um sawhsawhmi Rohingya Muslim pawl a thattu Myanmar ralkap 7 cu kum 10 thongtla ding ah biachah piak an si nain atu an luatter cang hna, thonginn ah an um caan kum khat hmanh a tling lo.

Thonginn aiawh biachimtu nih thong a tlami ralkap 7 cu thonginn ah an um ti lo, an luat cang tiah zapi theih in a chim. Zeiruang ah dah an luatter hna timi cu a chim lo.

Ralkap an luatter hna hi nikum November ah khan a si cang, atu lawng ah Reuters nih thil sining an thei i zapi theih in an phuan than hi a si.

Ralkap 7 lakah ai tel vemi pakhat cu Reuters nih bia an hal tik ah ‘kan luat thai cang, zeibia hmanh nan chim lai lo, nan hmurka nan cip ko lai’ an kan ti tiah a chim.

Rakhine ram Rohingya Muslim hna hi Tatmadaw ralkap nih ningcang loin an hrem hna, an velh hna i cheukhat cu an thah beh hna tiah tampi nih an soisel hna.

Ralkap 7 kum 10 thong an thlak hna hi Rohingya he pehtlaih in voikhatnak ralkap dantat an ton a si tiah an ruah, nain kum 10 thongthlak ding kha kum 1 hmanh an thlak hna lo caah a lungrawkmi an tampi. BBC