Mandalay airport: Tihnung tuk lio ah him tein vanlawng a tumter khawh caah pilot thangthat a tong

Yangon in Mandalay ah tuzing a rak i thawhmi Myanmar National Airlines cu Mandalay a tum lai ah a hmailei ke a chuah kho lo, emergency in a tum nain minung khawndennak a um hraw lo.

Vanlawng a hmai lei ke a chuah khawh lo hnu in vanlawng mawngtu pilot nih zeitindah vanlawng ka tumter lai timi a ruat, vanlawng a rihnak zor deuh seh tiin datsi a dih tiang ai chawk hmasa, datsi a dih deng hnu ah emergency in a tumter hi a si.

Vanlawng a tum lio ah a hnu lei ke lawnglawng a hman, a hnu lei ke in tlawmpal a tlikter hnu ah vanlawng a hmai nih vawlei a sut, tlawmpal meikhu a chuak nain mei a alh lo, khualtlawng vialte him tein an chuah khawh hna.

Vanlawng ai citmi lakah Myanmar actor minthang ngai a simi Nay Min zong ai tel ve, thinphang taktak in a umnak kong Facebook ah a chim len.

Vanlawng a hmailei ke a chuah lo buin vanlawng him tein tumter khawh hi a har ngaimi a si, minung khawndennak le thihnak a chuak tawn.

Nain, MNA pilot nih him tein vanlawng a tumter khawh caah thangthat a tong ngaingai. Mandalay region chief minister zong nih a rat hnawh i a cung ah lawmhbia a chim.