Mandalay police nih training tuah lio ah bomb taktak an hman sual, a puah hnawh hna

Vawlei ah an phummi bomb hmuh tikah zeitindah him tein thianh awk a si timi training an tuah lio ah Mandalay police nih bomb taktak an hman sual i a puah hnawh hna, police 11 hliamhma an hmu.

Training tuahnak ah cun bomb adeu hman awk a si, adeu hman an i tim ko nain a taktak an hman sual diam caah police pakhat nih a lamh i a puah hnawh hna hi a si.

Hliamhma a hmumi lakah pahnih hi an hma a fak ngai, pakhat cu a ke fak ngai in ai khawn caah tan piak a hau ding dirhmun ah a um. Ai hliammi cu siizung an kalpi dih hna i pathum cu an chuak than cang.