Myanmar police nih ziknawh eihmuartu cozah company hruaitu an tlaih cang

Cozah mining company No. 2 Mining Enterprise ah director-general a tuanmi U Than Naing cu ziknawh a eihmuar caah ziknawh dohtu phu ACC nih taza an cuai, police nih an tlaih cang.

U Than Naing nih a nawlngeihnak ningcang loin a hman i company pakhat cu kyat 3.3 million a hal hna, beach a kalnak hotel man kyat 4.2 million zong ningcang lo ngai in company pakhat a pekter fawn hna ti a si.

Anti-Corruption Commission (ACC) sin ah U Than Naing a eihmuarnak kong report an rak tuah hnu in ACC nih felfai tein kherhhlainak an tuah i a sualnak an hmuh khawh hi a si. U Than Naing cu kum 10 tiang thongtla ding dirhmun ah a um.

NLD cozah kuttang ah a eihmuarmi cozah upa tam nawn tlaih an tong cang, nai ah khan Taningtharyi chief minister nu zong ziknawh eihmuar ruang ah an tlaih ve. Kum tampi thonginn ah caan a hman ve lai. Irrawaddy