Myanmar thonginn buainak kong ah ‘taw sawhtu an um, kan kawl hna lai’ – President Office

Zahan le tuni cu Myanmar ram chung thonginn tampi ah thongtla pawl an buai i khuaci an mui, voikhat ah lungrual ngai in an buai caah forhtu an um, kherhhlainak kan tuah lai tiah President Office nih an thanh.

Shwe Boo, Myitkyina, Pathein, Kalay, Pha-an, Tha-way le Thayarwadi thonginn ah thongtla pawl an buai hi a si. A dang thonginn ah cun thihlohnak um hraw loin an daihter, nain Shwe Boo ah cun an buai tuk caah police nih thongtla 4 meithal in an kah hna, an thi.

Voikhat te ah an buai hlei ah an buainak hna cu thongtla cheukhat nih Facebook ah live an thlah. Zeitindah mobile phone an ngah khawh timi kong ah tampi an khuaruahhar ngai.

Thonginn ah a bubu in i funtom khawh le biaruah khawh a si lo, nain tutan buainak ah thonginn pawl an lungrual i an halmi ai khat pah dih, thonginn pakhat le pakhat an lungrual fawn caah a thawng ngaimi bu pakhat khat nih an taw an sawh ko hna lai tiah ruah cio a si.

President Office nih,”Thonginn chung buainak tiang mobile phone in thongtla lila nih live an thlah than tikah a buaimi thonginn pakhat le pakhat pehtlaihnak an ngei i bawmhtu zong an ngei tiah kan ruah, thil sining fiang tein theih khawhnak ding caah thuk piin kan kherhhlai lai,” tiah an chim.

April le May thla chung ah President Win Myint nih Myanmar ram chung thongtla 23,000 a luatter hna. Tar, nu, mizaw, tlamtlinglo le mino papek an si.

Luattermi 23,000 lak ah ai tel lomi hna nih President Win Myint thiltuahmi a dik lo, thleidannak a ngei an ti i zahan le tuni an buai hi a si.Atu hi cu a dai dih cang. BBC