President Win Myint nih vawlei media a hninhtu Reuters journalist pahnih a luatter hna

Rakhine Rohingya thahnawnnak kong an tial ruang ah kum 7 thongthlak a tongmi Reuters journalist Kyaw Soe Oo le Wa Lone cu tuzing kha President Win Myint nih a luatter hna.

Kyaw Soe Oo le Wa Lone hi December 2017 ah an tlaih hna i caan saupi bia an ceih piak hna hnu ah nikum September ah kum 7 thong an thlak hna. Thawngpang an tial ruang ah kum 7 thongthlak an ton tikah media zalawnnak tanpitu tampi an lungrawk, Myanmar cozah fak piin an soisel.
tunge
Kan hnu thla ah President Win Myint nih thongtla tampi a luatter cang hna, Reuters journalist an i tel ve hnga maw tiah tampi nih rak i ngeih ngai a si nain an i tel lo.

Tuzing ah thongtla 6,520 a luatter than hna, anmah lakah Kyaw Soe Oo le Wa Lone zong an i tel ve hi a si. Ralkap le ralkap tanpitu phu cu an lungrawk ngai lai.
khomu2
Rakhine ah Rohingya thah an tonnak he pehtaih in Wa Lone le Kyaw Soe Oo nih kherhhlainak thuk piin an rak tuah, ralkap le palik an sualnak tampi an theih khawh.

Reuters journalist pahnih an riantuannnak cu palik le ralkap nih an theih tikah tlaih in thongthlak an duh hna, tlaih khawhnak ding caah rap an chiah khenh hna. Palik nih cozah biathli an pek hna, cu biathli an sin a um hnu in ‘cozah biathli nan fir’ tiin an tlaih hna i taza an cuai hna hi a si. BBC