Tatmadaw nih Laiza pawng ah Kachin Baptist member 15 bak an tlaih hna

Tatmadaw nawlpeknak lak hmasa loin KIA hmunhma Laiza ah nan lut, upadi nan buar an ti hna caah Kachin Baptist Convention(KBC) member 15 cu Tatmadaw nih an tlaih hna.

Tlaih a tongmi hna hi nu 8 le pa 7 an si hna. An dihlak in KBC nih an hman ngaimi le bochan ngaimi an si. KIA sin bawmhnak an pek hna i an kir lei ah tlaih an ton hi a si.

Atu hi minung 3 an luatter than hna, zeiruangah dah anmah pathum lawnglawng an luatter rih hna timi cu theih a si rih lo.

Kachin state cozah zong nih KBC chungtel luatter than colh ding ah Tatmadaw sin halnak an tuah cang, harnak a tongmi an bawmhmi a si caah tlaih an ton awk a si lo an ti. Tatmadaw nih zei an rel lai maw timi cu theih a si rih lo. Irrawaddy