Tihnung ngaimi phungki Wirathu: ‘Tatmadaw ralkap hi pathian bantuk in biak awk an si’

Kawl phun le Buddhist biaknak tanhnak in a minthang ngaimi phungki Wirathu nih Hluttaw ah a thumi Tatmadaw ralkap hna hi pathian bantuk in biak awk an si tiah tuni Yangon sandah piah lio ah a chim.

“Hluttaw ah a thumi ralkap hna khi huat an i huah buin rampi caah tiin rian an tuan, hlawh an ngahmi zong MP hlawh bantuk a si lo, ralkap hlawh menmen an ngah. Ralkap hlawh menmen an ngah ko nain huatnak an ing i rampi caah rian an tuan chih ko. A ngaingai ti ahcun pathian bantuk in thangthat a phumi an si,” tiah Wirathu nih zapi sin ah a chim.

Ram caah hitluk rian an tuan ko buin ral bantuk in huat an tong, hibantuk caan ah 2008 Phunghrampi kan remh lai timi cu a si kho lomi a si tiah a chim chih.

Tuni kha Yangon khuachung ah Kawl phun tanhtu hna nih 2008 Phunghrampi remh an duh lonak kong lampi an zawh, MP hlun Hla Swe le Wirathu zong bia an chim. Kawl phun tanhtu tam ngai an chuak.

Suu Kyi president a si khawh lonak ding ah a tuahtu poahmah 59(F) hi cu remh bak lo ding, state le region chief minister thimnak kong poahmah 261 cu a herh ning in remh ding timi hi tuni an aupi bikmi cu a si. Irrawaddy