U Ko Ni a thattu Kyi Lin le Aung Win Zaw cu thihdan an pek taktak cang hna

Yangon airport hmai bak ah sihni minthang U Ko Ni meithal in a lu ah a kah i a thattu Kyi Lin le a bawmtu Aung Win Zaw cu Yangon biaceihtu nih thihdan an pek ko cang hna.
mozaw1
U Ko Ni thahnak ah an i tel ve tiah an ruahmi Zeya Phyo le Aung Win Tun zong thongdan an pek ve hna, Zeya Phyo cu kum 5 thongdan le rianhrang tuan ding, Aung Win Tun cu kum 3 thongtla ding bia an chah piak hna.

U Ko Ni chungkhar lei in a dirmi sihni U Khin Aung Htay nih cun misualpa Yeya Phyo hi kum 5 lawng thong thlak awk a si lo, fak deuh in dantat awk a si, fak deuh in dan an tat nak hnga a sang deuhmi biaceihzung ah taza ka cuai than lai tiah a chim.

U Ko Ni hi January 29, 2017 ah an thah cang. Misual hna an tlaih hna hnu in kum 2 chung bia an ceih piak hna. Atu lawng ah biachahnak an tuah hi a si.
u ko ni
U Ko Ni thahnak ah tuanvo a ngeitu bik tiah an ruahmi Aung Win Khaing cu tutiang ah an tlai kho rih lo, khawika dah a tlau timi zong an thei lo. A hnu bik CCTV ah a langh hi Naypyidaw ah a si.

Myanmar ram chung ah 1988 thawk in thihdan pek a tongmi hna cu thah an tong bal ti lo, thihdan pek hi nunchung thongthlak bantuk ah ai cang. Kyi Lin le Aung Win Zaw zong thah an tong taktak lai maw timi chim khawh a si rih lo.

NLD upadi lei ruahnak petu U Ko Ni hi ralkap sermi 2008 Constitution a rem lo ngaimi a si, ralkap minung le USDP nih cun an rem lo ngaingai. 2008 Constitution a soisel tawn ruang ah thah a ton hi a si tiah ruah cio a si. Irrawaddy

mozaw3

mozaw2

mozaw6

mozaw5

mozaw4