Wa ralkap thazaang an langhtermi cung ah Tatmadaw an lungfak tuk, an tahchuak

Kan hnu April ah Wa hriamtlai phu nih an ralkap thazaang an langhtermi cung ah Myanmar Tatmadaw an lungrawk tuk, daihnak kan duh caah kan thin kan i sum tiah an chim.

Wa nih ralkap thazaang an langhter ning zoh tikah Myanmar cozah le Tatmadaw he ai zuam cawhmi an lo, anmah tluk in kan thawng ve, kan ti kho ve an timi a lo, Tatmadaw nih a si khawh chung in kan thin kan i sum rih ko tiah Tatmadaw ralbawi Maj-Gen. Soe Naing Oo nih zapi sin a chim.

Wa ralkap thazaang an langhter lio ah hriamnam thatha an langhter, hriamtlai phu cheukhat nih an ngei khawh lomi drone vanlawng hmete le vanlawng a kap khomi anti-aircraft missile bomh zong an langhter.

An thawn ning zapi hmuh a si tikah Tatmadaw nih an celh lo, Tatmadaw policy ah cun Myanmar ram chung ah Tatmadaw lawnglawng ralkap phu a um awk a si an ti. Nain, Wa hriamtlai phu an zoh tik hna ah Tatmadaw policy cu sullam ngei lo ah ai cang.

Wa hriamtlai phu UWSA phu hi 1989 kum ah ralkap cozah he kahdaihnak an rak tuah cang, cu hnu ah Myanmar Tatmadaw he an i kap bal ti lo. Atu cu an thazaang a thawng tuk cang i tih an nung bak ko cang.

Wa hi Myanmar ram chung a ummi a si ko nain Tatmadaw le Myanmar cozah nih zeibantuk nawlngeinak hmanh an ngei lo, anmah tein an i uk. Ralkap 30,000 hrawng an ngei. Irrawaddy

wowma2

wowma1