Yangon airport: ‘Ralhrang rak luh an timh, i ralring u’ timi warning a um caah security an chap

Myanmar ram chung ah Muslim ralhrang luh an timh tiah Malaysia police nih Myanmar nawlngeitu ralrin an rak pek hna caah tuhi Yangon le Mandalay airport ah security tam lak an chap cang.

Voidang nakin airport ah minung checkhlai zong a tam deuh cang. Airport chung police milu zong tam taktak an karh fawn. Ralhrang luatter bak lo ding an i zuam.

Ramri in luhnak vialte zong ralrin an pek cio ve hna. Rakhine ram Sittwe airport zong ah police an chap, buainak hmunhma pawngkam a si caah hmundang nakin ralrin deuh a herh an ti caah a si.

Nai ah khan Sri Lanka ralhrang minung pakhat Myanmar ram chung a lut an ti i an kawl nain a chuak than cang timi an theih. Lung mansung a zuarmi a hawipa lawng police nih an tlaih khawh.

Myanmar ram chung ah Buddhist nih Muslim an thleidang hna, an nek hna timi ruahnak a um. Rohingya Muslim tampi zong Tatmadaw ralkap nih an thah hna tiah sual puh an si.

Rohingya cung ah Myanmar ralkap tuahsernak hi lehrulh a hau tiah Muslim ralhrang nih an chim theumi a si. Lehrulhnak lam an kawl te ko lai tiah tampi nih an zumh. Irrawaddy