Yangon biaceihtu nih Reuters journalist ‘kum 7 thongthlak nan phu ko’ a ti hna

Rakhine ah Rohingya pahnih thah an tonnak kong kherhhlainak an tuah i tlaih a tongmi Reuters journalist pahnih cu Yangon biaceihtu nih kum 7 thongthlak nan phu bak ko tiah bia a chah piak hna.

Tuan deuh ah khan a dang Yangon biaceih zung pakhat nih Reuters journalist pahnih Wa Lone le Kyaw Soe Oo hi Myanmar biathli upadi nan buar tiin kum 7 thong an thlak hna. Nain, a dik hrimhrim lo an ti i bia ceih piak than ding biaceihzung dang ah an kal than hi a si.

Tutan biachahnak a tuahtu nih journalist pahnih an catialmi le kherhhlainak an tuahmi vialte a zohfel dih tikah nan sual ko, kum 7 thongthlak phu nan si ko a ti hna hi a si.

Reuters nawlngeitu cu an lungrawk ngaingai, thil sining dik thawngthanh hi sualnak a si hrim lo, hi biachahnak nih Myanmar ram chung media zalawn lonak thuk piin a langhter tiah an chim.

Rakhine ah Rohingya thah an tonnak he pehtaih in Wa Lone le Kyaw Soe Oo nih kherhhlainak thuk piin an tuah, ralkap le palik an sualnak tampi an theih khawh.

Reuters journalist pahnih an riantuannnak cu palik le ralkap nih an theih tik ah tlaih an duh hna, tlaih khawhnak ding caah rap an chiah khenh hna. Palik nih cozah biathli an pek hna, cu biathli an sin a um hnu in ‘cozah biathli nan fir’ tiin an tlaih hna hi a si.

Caan sau ngai bia an ceih piak hna, palik nih rap an chiah khenh hna nak kong zong palik bawi pakhat nih a phuan. Nain, biaceihtu nih cun Wa Lone le Kyaw Soe Oo hi an sual ko a ti caah kum 7 tiang thong a thlak hna hi a si.

Anmah pahnih kum 7 bak thong an thlak hna nak kong ah UN le ramdang hruaitu an lungrawk ngai cio, Myanmar ram chung media zalawnnak a hnu lei a kir ko cang tiah Myanmar cozah an soisel. BBC

photu2

photu3

photu4

photu