Hamas ralhrang nih Israel ah rocket bomb 200 bak an kah, Israel nih a lehrulh colh ve

Palestine ralhrang phu Hamas nih Israel ram chung ah rocket bomb 200 bak an rak kah, Israel rammi 3 hliamhma an hmu, a thimi an um hraw lo.

Israel nih Hamas ralhrang phu cu a lehrulh colh hna, raltuk vanlawng in an thuat hna hlei ah ramri a ummi tank in Hamas hmunhma ah bomb an kah ve. An lehrulh hna nak ah Palestine rammi 2 a nunnak a liam.

Zahan kha Hamas phu le Israel ralkap an i kap i Israel ralkap nih Hamas ralhrang 2 le Palestine mi sawhsawh pahnih an thah hna. Cu hnu ah ram hnih kar buainak a karh i Hamas nih rocket bomb an rak thlah hnawh beh hna hi a si.

Atu ning ah cun Hamas ralhrang le Israel ralkap kar ah i rem lonak karh chin dawh a si. Egypt le UN nih ram hnih kar caan sau a nguhmi kahdaihnak ser ding an i timhtuah lio a si ko nain.

Hamas ralhrang nih Israel ram chung ah rocket bomb a kah hi a voi ngai cang. Israel cu van ah rocket bomb a khuai khotu meithal tha Iron Dome a ngei i rocket tam deuh cu van ah a khuai khawh hna. BBC