2020 US president thimnak: Tulsi le Castro nih Trump singkhaw an timh cang

Caan tampi ai duh rih ko nain Democrat tampi cu an um kho ti lo, 2020 ah President Trump a thutnak chuh dingah Julian Castro le Tulsi Gabbard timhtuahnak an thawk cang.

2020 ah Democratic Party in thimnak ai cuh dingmi an tam taktak te lai, kum dang nakin an tam deuh khun lai tiah tampi nih an ruah. Tutiang ah a fiangmi minung 3 an si cang.

Congressman John Delaney cu 2020 caah thimnak campaign a thawknak kum khat leng a si cang, a tuan bikmi Democratic candidate a si.

Julian Castro hi Latino hrinsor a si, Tulsi Gabbard cu Native American a si hlei ah Hindu a si, US ralkap zong a tuan bal hnu ah Hawaii aiawh in US Congresswoman zong a si. An pahnih in mipi uar ngai vevemi an si.

Democratic party in candidate zeitluk tam an chuak zong ah a donghnak ah cun vote pek a si lai i mipi nih an uar bikmi pakhat an thim te lai. Cu minung nih Trump a singkhaw te lai tinak a si. BBC