Ai phundang ngaimi report thar: President Trump nih Putin he biaruahnak a thuh

A luancia 2017 lio President Trump le Putin an i ton lio ah President Trump nih an biaruahnak vialte a thuh dih, a riantuantu zong zeihmanh a theihter hna lo tiah report thar nih a phuan.

Putin le Trump an i ton lio ah hin holh lettu lawng an i tel, a dang luh a ngah lo. Interpreter nih a tialmi note zong biaruahnak a dih in Trump nih a chuh fawn tiah Washington Post nih a tial.

President Trump nih cun Washington Post tialmi thawngpang hi a dik lo taktakmi a si, Putin he kan biaruahnak cu zapi nih ngaih khawhmi a si ko, a thlithup a si lo tiah a leh than ve.

Trump hi US rampi himnak caah tihnung kho men ko, Russia cozah caah riantuantu a si hnga maw tiin FBI nih sual kawlnak an tuahmi zong a si.

2016 thimnak ah Russia he rian an tuanti maw, Trump a tlin khawhnak ding caah Putin Russia cozah nih zeitindah a bawmh timi zong Special Counsel phu nih kherhhlainak an tuah cuahmah lio a si. BBC