Gay kong ah US biaceihzung ngan bik Supreme Court nih Trump teinak an pek

Nu sinak in pa sinak ah or pa sinak in nu sinak ah ai thlengmi nudok padok transgender hna hi US ralkap ah lut ti hna hlah seh timi Trump nawlchuahmi cu US Supreme Court nih an dirhkamh.

Gay a si ko nain a chuahpimi sinak ai thleng lomi, thlen zong ai tim lomi hna cu cohlan an si ko lai. Ai thleng ciami le thlen ai timmi hna cu US ralkap ah luh a ngah ti lai lo.

Transgender he pehtlaih in a luancia 2017 ah khan President Trump nih nawl a rak chuah cangmi a si, liberal nih an duh lo caah taza an cuai. Atu cu Supreme Court a phan i Trump teinak a hmuh hi a si.

Sinak ai thlengmi hna ralkap an luh tikah an i thlennak ah siizung an kainak man a fak tuk, hnahnawhnak zong a tam tuk fawn tiah Trump nih a chim.

Supreme Court biachahnak cu liberal phu an lungrawk hringhran ko lai, Obama phu tampi nih gay/transgender thleidan a si an ti cio. BBC