Lung nuam lo ngai in Trump le Kim Jong-un tonnak an ngol

Ruahchannak nganpi he President Trump le North Korea hruaitu Kim Jong-un cu Vietnam ah an i tong nain hnatlaknak an ser kho lo, lungnuam lo ngai in tonnak an ngol.

North Korea nuclear sernak hmun le nuclear kong research tuahnak vialte kan hrawh lai i US nih North Korea cung a chiahmi sipuazi phihnak vialte nan lak than dih ve lai tiah Pu Kim nih Trump a chimh i Trump a lungtling lo, a si kho lo a ti.

Sipuazi phihnak sanction kong ah kan i tonnak kan ngol, sanction vialte lak dih ding a chim tikah a si kho bak lo tiah President Trump nih a chim.

Tuni tonnak tlamtling sehlaw thaizing hi minsen thut ding a si, nain minsen thut awk a um ti lo caah thaizing tonnak a um ti lai lo.

Tutan tonnak ah Kim Jong-un nih nuclear vialte hrawh cikcek ding bia a kamh lo, nuclear sernak hmunhma hrawh in US nih sanction vialte lak than ding a hal hi a si.

Nuclear vialte hrawh hlan ah North Korea cung chiahmi sanction vialte lak than dih ding cu US caah a har ngaimi dirhmun ah a um.

Nikum June thla ah Pu Kim le Trump tonnak an rak ngei, hlawh a tling tiah tampi nih an ruah. Nain, tutan cu hlawh a tling lo, hmaichia ngai in an kir veve . BBC