Mipi theihter a duh lomi Trump a biathli cu New York Times nih an phuan piak

President Trump nih tax return a tuahnak mipi sin a langhter duh bal lo, nain New York Times newspaper nih 1985-1995 kar tax return a tuahnak vialte zapi sin an phuan piak dih.

Tax return a tuah ning ah hi kum hra chung ah Trump nih a sipuazi tuahnak in $1.17 billion bak a sung, kum fatin kumhra chung sunghzatlaknak he ai ciah ko. Hiti phaisa a sungmi cu Trump nih a langhter bal lo, a miak ngai bantuk in a um tawn.

Trump caah sunghzatlak bik kum cu 1990 le 1991 kum hi a si, kum khat ah $250 million leng bak a sung. Phaisa a sungmi a tam tuk caah US cozah nih income tax hrialnak nawl zong rak pek a si.

New York Times cung ah Trump a thinhung ngai, lih chimtu newspaper nan si, 1985-1995 kar hi phaisa ka sung lo, tax ruang ah ka sungmi lawnglawng tax return ah ka langhtermi a si tiah Trump nih a chim.

US president tampi nih president thimnak an luh lio ah tax return an langhter tawn, nain Trump nih cun a langhter duh bak lo, langhter ding an forh chih ko nain tutiang a langhter duh lo.

Trump a doh taktaktu New York Times nih Trump tax return copy cu an ngah lo nain tax return tuahnak ah minung pakhat an fial i a thli tein a zoh piak hna, Trump a tax return kong dikthlir in a chimh hna hi a si. BBC