NASA thawngthanhnak: Hmaikum thawk in vancung ah tourist kal khawh si cang lai

Vancung ah a ummi International Space Station(ISS) ah hmaikum thawk cun khual tourist zong kan kalter cang hna lai tiah NASA nih thawng an thanh.

ISS ah khual tlawn a duhmi hna cu nawlngeitu sin ah special in training an kai hmasa a hau. Kum khat ah khual tlawnnak voi 2 an tuah lai. Kum khat ah voi 2 lawng asi caah minung tam tuk an kalpi kho hna lai lo tinak a si.

Tourist in a kalmi hna cu ISS ah ni 30 an um lai i an rak tum than lai. ISS ah a kalpitu space vanlawng cu US sermi a si lai, ramdang ta a si lai lo.

ISS hi cozah phaisa in a nungmi a si, nain US cozah nih private company kuttang ah chiah an duh. Atu khualtlawnnak tawlrel ding ah SpaceX le Boeing tuanvo an pek hna.

NASA nih International Space Station hi tutiang ah sipuazi tuahnak ah an hmang bal rih lo, nain atu cu phaisa hmuhnak ding lam an hon ve cang tinak a si. BBC