Paw chung nauthah kong ah President Trump nih a dirhmun fiang tein a langhter cang

Nai hrawng hi US state tampi nih paw chung nauthah kong ah a strict ngaimi upadi thar an ser cio, nauthah a duh lomi Khrihfa le nauthah a duhmi liberal kar ah bia-alnak nganpi a chuak.

Hi kong ah President Trump zong a hun holh ve cang, ‘nunnak poahpoah a biapi, hloh awk a si lo, nauthah ka duhmi a si lo, tlaihhrem, chungkhat nih nau pawiter sualmi le hringtu nu nunnak caah tihnung a si sual lawng ah nauthah onh ding a si’ tiah President Trump nih a chim.

Nunnak poahpoah runven a hau tiah ka ruah i kum hnih chung rian kan tuanmi kan hma a kal ngai ko, nain misual liberal pawl nih cun a chuak dengmi nau zong thah an duh, liberal pawl kan tei hna nak ding caah 2020 zong ah hmunkhat te ah kan dirti a hau, teinak kan hmuh rih a hau tiah Trump nih a chim chih.

US ram chung ah 1973 hnu in paw chung nau thah a ngah. Trump US president a tuan hnu in state tampi nih nauthah an duh lonak upadi thar an ser cio.

Alabama state nih an sermi upadi thar hi a strict bikmi a si, hi upadi thar ning ah cun tlaihhrem le chungkhar nih pawitermi zong thah a ngah lo, nu nunnak caah tih a nun lawng ah thah khawh a si.

Upadi hna hi biaceihzung ah a phan lai i an thah piak khawh hna, nain a sang bikmi Supreme Court ah Khrihfa nunphung tanpimi biaceihtu an tam deuh caah anmah sin a phak ahcun nauthah hi an kham ko lai tiah ruah a si.

Republican pawl an thil tuahmi cung ah liberal pawl an lungrawk tuk, nau thah le thah lo cu midang nih an i thlak awk a si lo, nau pawimi nu a nawl a si an ti ve. An buai ngai hna. BBC