President Trump: ‘IS sahrang hruaitu Abu al-Baghdadi kan thah khawh cang’

Vawleicung misual ralhrang phu lakah tihnung bik tuanbia a tialmi Islamic State (IS) i an hruaitu Abu Bakr al-Baghdadi cu US special ralkap nih Syria ah an thah khawh cang, President Trump nih a fehter.

Sahrang pa hi Turkey he a naihnak Idlib province ah ai thup, US spy nih a umhmun an theihnak zarhthum hrawng a si cang. Caan sau nawn an ngiat hnu ah an luh hnawh hi a si.

An luh hnawh lio ah US ralkap nih Abu al-Baghdadi a zohkhenhtu IS ralhrang ralkap tampi an thah hna. US ralkap lei cu a thimi an um hraw lo.

Abu al-Baghdadi cu vawleitang khur tunnel ah a lut i US ralkap uico nih an dawi, a tap chih, tuah awk a thei ti lo hnu ah ai kenmi bomb a puah i amah tein ai that lawlaw. A sin ummi a fale 3 zong an thi chih ve.

Abu al-Baghdadi an thah khawh cu US cozah le vawlei caah thawngtha tuk a si. Nain, IS ralhrang caah cun thawngchia taktak a si ko. Amah loin an dir than khawhnak ding lam a tlawm ngaingai, tlau beh dawh an si cang.