President Trump nih ’emergency’ thanh in ramri vampang sak a timh ko cang

US Congress nih vampang saknak ah a herhmi phaisa an fehter duh lo caah President Trump nih lamdang thim ai tim, emergency thanh in vampang ka sak lai a ti cang.

President Trump nih vampang saknak caah $5.7 billion a hal, nain US Senate nih $1.3 billion lawng hman ding an fehter. President Trump a lungrawk ngai.

Emergency thanh in mah duhmi tuah a timh hi sullam a um lomi a si, a phung a si lo, nawlngeihnak ningcang loin hman a si tiah Democrat tampi nih Trump cu an soisel cia cang.

Trump nih ai tim ning in a kalpi taktak ko ahcun Democrat lei nih biaceihzung ah taza an cuai len te lai tiah ruah a si.

Republican tampi nih cun Trump biachahnak an lungtlin pi, upadi ning tein ramri sak a timhmi a si, phung he ai kalhnak a um lo tiah Senate ah Republican hruaitu Mitch McConnell nih a chim.

Mexico ramri ah vampang ser ding hi Trump thimnak biakam lakah biapi bik tiah ruahmi a si, a si khawh chung in vampang ser tlamtlinter ai zuam. BBC