President Trump nih Mexico vampang kong ah rammi dihlak sin bia a chim

Mexico ramri ah vampang sak a herhnak hringhran, Mexico lei in misual le rithaisii thalo a lutmi a tam tuk cang i kan control hrimhrim a herh tiah President Trump nih tunai kha a chim.

Vampang kan sak hi kan innpa kan huat ruang ah a si bak lo, kan inn chung ah a ummi kan dawt hna ruang ah a si, inn chung ummi him hna seh ti kan duh ruang ah vampang ser a si tiah Trump nih a chim.

Mexico ramri in US ram chung ah rithaisii tamtuk a rak lut, misual tamtuk an lut fawn, misual nih sualnak ngeilo US rammi an thah hna, rithaisii ruang ah US rammi a thimi an tam tuk cang, hihi zoh sawhsawh ding a si ti lo, vampang kan herh tiah a chim chih.
naiton1
Vampang caah cozah phaisa hman ding cu Democrat nih an duh lo caah tutiang hi US cozah budget an fehter kho lo, US cozah cheuchum an khar chung. An kharnak ni 18 a si cang.

President Trump nih ‘national emergency(azipaw)’ a thanh lai i Democrat hnatlakpinak tel loin vampang a sak men lai timi zumhnak a um nain azipaw a thanh hraw lo.

Democrat nih cun ramri vampang caah cozah phaisa hman ding an duh bak ve rih lo, a si kho lo an ti ve rih ko. Tuan ah hnatlaknak ser kho dawh an si lo. BBC