Private email kong ah Ivanka Trump sualpuh, ‘Pi Clinton he cun kan i lo loh’ a ti

Pi Clinton kha US ramdang vuanci a rak tuan lio ah pumpak email a rak hman i FBI nih thongthlak ding tiang a sualnak an rak kawl bal, Trump le Republican nih fak piin an rak soisel.

Nain, President Trump a fanu a si i ruahnak petu zong a si chihmi Ivanka Trump zong cozah rian kong ah amah pumpak email a hman diam ve ko. Fak piin soisel a tong.

Pi Clinton he private email kan hman ning cu ai lo bak lo, ai dang tuk khi a si, keimah email ahcun biathlithup pakhat hmanh ai tel lo, upadi ka buarmi a um bak lo tiah Ivanka Trump nih a chim.

Cozah riantuannak ah keimah pumpak email cu ka hman taktak ko, nain atu tiang ah ka email pakhat hmanh ka delete lo, cozah sin ah tha tein ka pek than dih tiah a chim chih.

Pi Clinton kha pumpak email a hman ruang ah FBI nih thongthlak ding a sualnak an kawl, thongthlak a phu lo tiah biachahnak an tuah. Nain, Trump nih cun thongthlak awk a si tiah a chim lengmang. BBC