Robert Mueller nih report kong a fianter, Trump ai lawm i Democrat an tahchuak lai

Tuan deuh ah khan Robert Mueller nih FBI he kum hnih chung President Trump sualnak an kawlmi kong report an tuah, Russia he pehtlaih in President Trump a sualnak kan hmu lo tiah an fehter.

Report kong ah a lungtling lomi Democrat an tam ngai, Robert Mueller hmurka in fianternak a tuah a herh tiah an chim cio. Trump a sual ko lai tiah Democrat tampi nih an zum rih, nain Robert Mueller nih tunai kha fianternak a tuah i report ning tein a chim than ko.

Robert Mueller nih report kong zapi theih in a chim i Trump a sualnak ngaingai ai tel lo caah Trump ai lawm ngai, nain Trump thlak a duhtu Democrat pawl cu an lungrawk ngai dawh a si.

“Mueller report kong ah zeihmanh ai thlengmi a um lo. Sualkawlnak ah sualnak ngaingai an hmuh khawh lo caah sual lo a si ko. Chim awk a um ti lo, a dih cang. Kai lawm,” tiah President Trump nih a chim.

Democrat nih cun Congress ah hmaitonh in Robert Mueller biahal an duh rih, nain report a ummi leng zeihmanh chim awk ka ngei lo tiah Mueller nih a chim.

Mueller hruaimi FBI phu nih kum 2 chung Trump te phu an sualnak an kawl hna i an hmuh kho hna lo, nain Congress ah cun Democrat pawl nih an sualkawlnak peh peng an tim rih ko. BBC