Trump ruang ah Huawei phone company khuaci an mui, zaangfak an si ko

China company a simi Huawei cu President Trump nih blacklist ah a chiah hnu in khuaci an mui ko cang, Google telh in a biapi ngaimi US company tam nawn nih an kaltak caah harnak an tong.

Google nih Huawei company cu Android operating system tam nawn hmannak nawl a phih piak lai, Huawei phone a hmangmi hna nih Google a thilri a simi YouTube, Gmail le Google Map tibantuk an hmang kho ti lai lo.

Phone ah a biapi bik Google app pawl cu Huawei phone ah hman khawh a si ti lai lo caah mi tampi nih Huawei phone an caw duh ti hnga maw tiah ruah a si. Huawei caah thawngpang chia taktak a si ko.

Huawei hi China cozah company a si lo nain China cozah nih ramdang cozah ngiatnak caah a hman khawh, a bik in 5G technology hmang in ramdang cozah bihnak ah a hman khawh tiah nitlak lei ram tampi nih an ruah.

Rampi himnak caah tih a nung kho an ti caah US cozah nih Huawei phone blacklist ah an chiahnak hi a si, US company hna zong Huawei he pehtlaih lo ding nawl an pek hna.

Android ah a biapi ngaimi app tampi hmannak nawl a ngei ti lai lo caah Huawei nih zeitin kar a hlan te lai timi theih asi rih lo, amah tein operating system thar a ser lai tiah zumh cio a si. BBC