Tulio US ah an buaipi taktakmi gay actor Jussie Somllett luatnak, Obama huham ai tel an ti

Empire timi movie ah actor a tuan i minthang ngai a simi Jussie Smollett cu zohchia tuk in a lih caah police nih an tlaih, kum tampi thong a tla rua lai an ti nain ruah lo piin an luatter diam ko.

Jussie nih Chicago police sin ah lihbia a chim hlei ah a dik lomi bia a ser caah sualnak phun 16 in taza an cuaimi a si. Bia ceih piak hna sehlaw kum tam nawn thong a tla hnga.

Bia an ceih piak hlan ah sihni nawlngeitu hna nih Jussie a sualnak vialte hloh piak dih, ruah lo ngai in an luatter diam ko. Mizapi an khuaruah a har. Chicago police cu an lungrawk hringhran.

Jussie a sualnak vialte hloh piak dih ding a tawlreltu bik hi Obama nupi a riantuantu nu Tina Tchen a si tiah an ruah. Tina Tchen le Jussie a chungkhar nih sihni lutlai an ton, cu hnu ah a sualnak vialte cu an hloh dih a si tiah an phuan.

January dongh ah khan Jussie cu siizung a phan i ‘velh ka tong, mirang pahnih nih biachia kha taktak in an ka hro, hri in an ka tem chih’ tiah police a chimh hna. Jussie a hmai ah hliamhma cheukhat zong a um.

Police nih thil sining an hlat tikah Jussie a lihnak an hmuh khawh, Nigeria rammi pahnih phaisa in a hlan hna i mirang bantuk in um ding a chimhmi an si. An velh taktakmi zong a si lo, nan tuah lai a ti hna ning tein an tuahmi a si timi police nih an thei khawh.

Thil sining fiang tein an theih hnu ah police nih lih chim pa Jussie cu an tlaih colh, bia ceih piak in thong thlak ding a si nain sihni nawlngeitu nih ruah lo piin an luatter hi a si. BBC