US gay actor Jussie cu zohchia taktak in a lih caah police nih an tlaih cang

Empire timi movie ah actor a tuan i minthang ngai a simi Jussie Smollett nih zohchia taktak in mizapi hmai lih a chim hlei ah police zong a hlen fawn hna caah an tlaih cang.

January dongh ah khan Jussie cu siizung a phan i ‘velh ka tong, mirang pahnih nih biachia kha taktak in an ka hro, hri in an ka tem chih’ tiah police a chimh hna. Jussie a hmai ah hliamhma cheukhat zong a um.

Police nih thil sining an hlat tikah Jussie a lihnak an hmuh khawh, Nigeria rammi pahnih phaisa in a hlan hna i mirang bantuk in um ding a chimhmi an si. An velh taktakmi zong a si lo, nan tuah lai a ti hna ning tein an tuahmi a si timi police nih an thei khawh.

Thil sining fiang tein an theih hnu ah police nih lih chim pa Jussie cu an tlaih colh, bia an ceih piak lai i kum 3 tiang thongtla kho ding dirhmun ah a um.

Jussie nih lih a chim lio ah mizapi nih an rak zum dih, minthang celebrity tampi nih Jussie an tanpinak cu social media ah an langhter cio.

Jussie hi gay a si, President Trump a rem lo ngai ve. Aka velhtu hna hi Trump tanpitu an si, Trump nih a chim tawnmi Make America Great Again timi zong an ka velh lio ah an chim chih tiah a chim. Nain, mah vialte cu a lih lawngte a si.

Lih a sernak a ruang bik hi hlawh a ngahmi a lungtlin lo caah a si, lih ser in lar deuh a duh tiah police nih an chim. A fialmi minung pahnih hi $3,500 a pek hna. BBC