USA sermi Boeing vanlawng cu lainawngtu ah an ruah cang, an hmang ngam ti lo

US company Boeing nih an sermi vanlawng cu Indonesia ah accident a tong i minung 189 an nunnak a liam, zahan ah Boeing vanlawng thiamthiam nih Ethiopia ram ah minung 157 a thah rih hna.

Indonesia le Ethiopia ah accident a tongmi vanlawng hi Boeing company nih an ser tharmi Boeing 737 MAX an si. Thla nga chung ah hizat minung a thah hna tikah mipi nih Boeing vanlawng cu lainawngtu ah an ruah cang.

Ram tampi nih Boeing MAX cu tihnung tuk cang tiah an ruah caah an hmang ngam ti lo, nawlngeitu nih Boeing Max zuanter rih lo ding biachahnak an tuah.

Boeing Max hmang ti lo ding biachahnak a tuahmi ram lak ah China, UK, France le Germany an i tel. A dang airline company tampi zong nih Boeing MAX cu an hmang ngam ti lo.

US company hna nih cun Boeing MAX an hman peng rih ko, minung caah tihnungmi asi lo, zeihmanh phan awk a um lo an ti.

Ethiopia ah minung 157 a thattu Boeing vanlawng accident an tonnak aruang hi fiang tein theih asi rih lo, vanlawng ruang ah maw a si or thil dangdang ruang ah dah a si timi zapi nih theih duh ngai a si.

Indonesia ah accident a tongmi Boeing vanlawng kha cu a mawngtu nih vanlawng hmehnak(automated system) ai ziak deuh lo caah a si tiah kherhhlaitu nih an ruah.

Boeing vanlawng sertu company cu Ethiopia accident hnu ah ceilak phaisa an sung, an company share tamtuk a zor caah company man $27 billion bak a zor cang. BBC