Australia election result: Tampi zumhmi party an sung diam, khuaruahhar ko

Australia ram election cu tluang tein an lim i vote zong an rel dih ngawt cang, tampi nih Labor teinak an ngah lai tiah an ruah nain an sung diam ko.

Liberal party nih caan sau ngai cozah an tlaih cang i tutan thimnak ah cun Labor an thawng lai tiah rak zumh cio a si. Mipi biahalnak poll zong ah Labor nih Liberal party cu a tei lengmang. Nain, atu cu Liberal party le an hawile nih teinak an hmu ko cang.

Teinak a ngahtu tulio Australia Prime Minister Scott Morrison nih mizapi sin lunglawmhbia a chim, ‘ kei hi khuaruahhar thilti khawhnak a zumtu ka si, teinak kan ngahmi hi Australia rammi dihlak teinak kan ngah a si’ a ti.

Labor hruaitu Bill Shorten cu a party an sung timi ai fian hnu in zuam cawhtu PM Scott Morrison phone a chawnh i a lawmhpi colh. Labor hruaitu sinak in ai din fawn.

Tutan thimnak ah Liberal party in PM Scott Morrison lawng a cawlcang, adang a hawile nih an bawmh ngam tuk lo. Amah tein hehchet tiah campaign a tuah i teinak a hmuh khawh hi a si.

Teinak a hmumi Liberal party hi an min ah liberal ai tel ko nain liberal policy a ngeimi an si lo, conservative(US i Republican bantuk) policy a ngeimi an si. Labor hi liberal policy a ngeimi an si. BBC