Australia rampi thimnak an thawk cang, aho nih dah teinak a co hnga?

Australia ram chung thimnak tuzing an thawk cang, rammi vialte vote thlak hrimhrim ding an ti i vote thla khomi 90% cung nih vote an thlak lai tiah ruah a si.

Tulio cozah sertu Liberal party hruaitu Prime Minister Scott Morrison le Labor party hruaitu Bill Shorten hi prime minister hmunhma caah biatak ngai in an i zuam cawh. Aho nih dah a tei hnga tiah tampi nih ruah cio a si.

Liberal party hi an min ah liberal ai tel ko nain liberal policy a ngeimi an si lo, conservative(US i Republican bantuk) policy a ngeimi an si. Labor hi liberal policy a ngeimi an si.

Poll an tuah ning ah cun Labor nih teinak an ngah ko lai tiah an ruah, nain mark an ngahmi ai thlau tuk lo caah Liberal party zong teinak an ngah khomi dirhmun ah a um ve.

Australia ah citizenship a ngah cangmi Chinmi tampi an um ve, tuzing vote an thlaknak hmanthlak tete zong an rak tar cio. Labor a tanhtu zong an um i Liberal a tanhtu zong an um thiamthiam. BBC